المنتدى
الأم الناجحة
الأمهات الناجحة بتعمل إيه؟
==================================
لو بحثت على جوجل عن مواصفات لنجاحك في دورك كأم في تربية أولادك.. هتلاقي نتائج البحث معظمها يتلخص في أكساب أولادك مهارات شخصية تمكنهم ينجحوا في المدرسة و حياتهم و غرس قيم مهمة لنمو و تطور شخصيتهم.
يعني نجاح دورك كأم = نجاح أولادك
يعني هتفضلي تستنى و تنتظري لحد ما تحققي نتيجة مع أولادك و ينجحوا علشان تحسي بنجاحك !!
ده معناه ان لو نتيجة تحسن أولادك و تطورهم أتأخرت أو قابلتك صعوبات و تحديات معاهم.. هيكون معظم وقتك متوترة و مضغوطة و مش هتحسي بأي نجاح أو رضى عنهم.
انت ممكن تحسي العكس طول الطريق أنك لسة مش واصلة للنجاح اللي بتتمنيه و عندك شعور أحباط أو عجز أو لخبطة أو يأس أو حزن و في أوقات ممكن تحسي بالفشل.
في حين انك عمالة تسعي و تحاولي و مستمرة و هو ده قمة النجاح لك كأم.. انك مكملة رغم التحديات اللي بتقابلك.. انك واثقة في نجاح أولادك طول ما بتحاولي تطوري و تحسني قدراتهم و مهاراتهم و بتدوري على حلول لتحدياتهم.
◾◽الأمهات الناجحة اللي أعرفهم و شوفتهم و قابلتهم بتكون راضية و مرتاحة في السعي و المجهود لحد ما توصل لنتيجة..ممكن كمان توصل أنها تستمتع طول الطريق مع أولادها لحد ما النتيجة تتحقق◽◾
النجاح في تربية أولادك له مقياس مختلف لكل أم.. انت أيه مقياسك اللي بيطمنك انك ناجحة؟
أسألي نفسك أهم الأسئلة اللي هتساعدك تنجحي في كل سعيك مع أولادك ??
◾عايزة أولادي يكبروا و يكونوا أي نوع من الناس و الشخصيات؟
◾هعمل أيه النهاردة يساعدني أوصلهم للشخصية اللي بتمنى يكونوا عليها؟
◾هكون مثال حقيقي أزاي لتطور و تحسين نفسي قدامهم؟
◾ أزاي ممكن ألهم أولادي و أثر فيهم للتقدم للأفضل بدون ضغط و أجبار و تهديد و عقاب و زعيق و عصبية ؟
?أكتبي الأسئلة دي في بلانر أو نوتة عندك تفرغي فيها أفكار أمومتك و تربيتك لأولادك و أرجعي دايما للأسئلة فكري في أجابتها خاصة في الأيام اللي بتبعدك الضغوط و المشتتات عن هدفك مع أولادك.
أو لما تكوني مشغولة فترة عنهم في ظروف الحياة.. خلي حوارك الداخلي مع نفسك بالأسئلة دي يرشدك و يوجهك لنجاح أكتر في السعي مع أولادك.
هتكلم معاك في المقالات الجاية عن أهمية صفاء ذهنك و حضورك العالي بأنواعه المختلفة و ازاي هيفرق معاك و مع أولادك.
لكن حابة أعرف رأيك.. الأمهات الناجحة بتعمل أيه؟
لو تعرفي نموذج لأم ناجحة شاركي معاهم المقالة.. خلينا نقدرهم على مجهودهم الكبير ?
وتعليقك يهمنا هنا وهانرد عليه
#دمنارحسن #أمومةحقيقية
#مكانيكامب #ليكولأولادك
اترك تعليقاً
يجب أنت تكون مسجل الدخول لتضيف تعليقاً.